إتنين صعايدة جدعان
الأول: إزيك ، وإزى أبوك .. إن شاء الله تكون صحته إتحسنت
التاني: ماشي الحال الحمد لله ، بس الوالد مات
الأول: العمر الطويل ِلَك .. أتذكر أبوك كان عنده القلب .. الله يرحمه
التاني: صحيح .. بس والله مماتش بالقلب
الأول: معقول ؟ أمال إيه سبب الوفاة ؟
التاني: الله يرحمه .. فى الآخر نظره ضعف جدا.. ومرة طلع فى البلكونة وللأسف مشافش السور ، ووقع من الدور الرابع
الأول: يااااه موتة صعبة أوى.. ربنا يرحمه
التاني: والله ياأخى إتعذبنا معاه كتير وعملناله حوالى 12 عملية لغاية ماإَتْحَسَن
الأول: أمال توفى إزاى ؟
التاني: بقى يمشى على عكاز .. ومرة وهو بيعدى الشارع جت سيارة مسرعة خبطته
الأول: يالطيف ... الله يرحمه
التاني: ربك رحيم كان فيه لنا جار إبن حلال ، أخده بسرعة على المستشفى .. بس النزيف الداخلي فى الدماغ كان رهيب
الأول: الله يرحمه ...
التاني: بس إحنا سفرناه على إسبانيا وقعد هناك حوالى 6 أشهر تحت العلاج ، والحمد لله إتحسن بعد كده
الأول: طيب إزاى مات ؟؟؟
التاني: جاله فشل كلوي حاد وقعدنا ندور له على متبرع كلية وتأخرنا ، وللأسف حصله تسمم
الأول: الله يرحمه .. إرتاح
التاني: بالصدفة جه شخص يعرفه من زمان وإتبرعله بالكلية بتاعته فى آخر ثانية
الأول: أمال أبوك إزاى مات ؟؟؟؟
التاني: كان مرة قاعد فى البيت ، وأنبوبة البوتجاز إنفجرت ، وإحترقت الشقة بالكامل
الأول: يا لطيف .. موتة بشعة أوى .. الله يرحمه
التاني: بس والله الجيران .. الله يجزيهم كل خير كسروا الباب ولحقوه فى آخر لحظة
الأول: بقولك إيه .. ممكن تفهمنى أبوك مات إزاااااى ؟؟؟؟؟؟؟؟
التاني: والله إضطرينا فى الآخر نطخُّه بالبندقية